BACOLOD CITY – Paimbestigaran na ni Councilor Carl Lopez ang isa ka quarry operator nga naga-operate sa Brgy. Alangilan bisan wala ini nahatagan sang Resolution of No Objection (RONO) sang barangay council.
Madumduman nga sa interview sang DYHB kay Punong Barangay Degie Tanista sang Brgy. Alangilan, ginkumpirmar sini nga ang quarry site nga ginapanag-iyahan sang pamilya Arceo ang naga-operate bisan wala nila ini nahatagan sang RONO. Paathag ni Tanista, wala nila ginhatagan sang pahanugot ang nasambit nga quarry operator bangod nga may mga CARP beneficiaries nga nag-petisyon sa ila nga duta.
Sa interview naman kay Lopez, chairman sang Committee on Environment and Natural Resources sa Sangguniang Panlungsod, iya ginpasalig nga imbestigaran ang quarry operator.
Samtang ginkumpirmar man sini nga may isa ka operator nga nag-agi sa iya komitiba kag nahatagan sang permit bangod nga kompleto ang mga dokumento sini kag may endorsement hali sa barangay. Una naman nga ginkumpirmar ni Tanista nga duha ka operators ang naga-quarry karon sa Alangilan, ang isa ang may pahanugot nila samtang wala ang isa kag iya ini sang pamilya Arceo.
[image: image.png]
