General Santos City–Gipaniguro ni Police Col. Gilberto Tuzon, OIC City PNP Director sa Gensan City Police Office nga magpadayon ang ginahimo nga random checkpoint sa kapulisan matag adlaw.
Tumong niini aron nga mabatukan ang kriminalidad hilabina sa riding in tandem criminals ingon man ma-implementar ang executive order sa lokal nga panggamhanan. Sumala niini nga ang maong lakang ang ilahang usa ka pamaagi aron mapugngan ang mga planong dautan sa mga kriminal.
Dugang pamahayag ni Col. Tuzon nga ubay-ubay ang ilahang mga nadakpan sa gihimong random checkpoints kung asa ilahang gipatuman ang minimum health protocol. Sumala niya nga luyo pa man sa panawagan sa gobyerno, aduna gihapoy pipila nga wala nagatuman rason nga madakpan sama nalang sa wala pagsul-ob sa face mask ug face shield.
Samtang kauban nila ang HPG sa maong implementasyon ug ang HPG maoy nagahatag ug citation ticket sa tanang madakpan nga adunay bayolasyon sa R.A 4136.
Kalabot niini, gibutyag ni Col. Tuzon nga aduna silay mga ginahatag nga konsiderasyon hilabina sa mga aduna lamang minor violation. Apan sugod karong adlawa, hugot na nilang ipatuman ang istriktong implementasyon sa tanang balaud ingon man sa Executive Order ug dili na muhatag pa ug warning sa mga madakpan.(LVR)
