Moabot na sa 40 ka mga Surigaonon an nagpositibo sa HIV AIDS, sumaya pa ni Ms. Connie Reyes an HIV AIDS Counselling Nurse sanan Incharge sa Caraga Regional Hospital Accredited Treatment Hub.Ini base sa ila record sa mga kliyente na nagpatan-aw o nagpa-test sanan kasamtangan tagserbisyuhan nan treatment hub. Sa amu na gidaghunon, 28 sa mga pasyente na layaki an naapektuhan o nakuha an amu na sakit sa pakighilawas sa kapareho rasab nila na layaki,siyam (9) isab an bisexual,sanan tuyo (3) an heterosexual .Tagbutyag pa ni Reyes na inin 40 kabuok puro taga Surigao na nagpatan-aw o nagpatest sa Caraga Hospital Treatment Hub. Tagkumpirmar isab na may isa ka individual an tagrefer sa ija buhatan na namatay sa panimayay niini kuman bag-o sanan nakumpirmar na nagpositibo sa amu na sakit nan jadton tuig 2012 pa.Jauy isab kaso kuman bag-o na tuyo kabuok na taghuyat pa isab an kumpirmasyon kon positibo o dili.Tagtutukan na isab kuman sa DOH an pagpanhingusog sa pagpalapad pa sa kampanya sa amu na sakit labina kay migawas na paspas o mitaas an kaso sa mga teenagers o mga kabatan-onan na apektado sa amu na sakit . Nahibaw-an isab nan RMN Surigao na taas gajud an pagsaka kuman sa kaso sa HIV dinhi sa syudad nan Surigao sanan Provincia base sa narehistro na rekord nan DOH.
