Makuting gisusi karon sa National Bureau of Investigation kon NBI ang record sa duha ka Chinese nationals kon duna bay ilang sindikato o wala sa ilang pag-anhi sa Cagayan de Oro.
Matud ni NBI Regional Director Patricio Bernales nga ilang gisusi ang travel document nilang Shen Zhu Quing ug Lu Qui nga ang nadakpan sa mga elemento sa NBI ug Regulatory and Complaint Board sa usa hotel ning syudad nga dunay kuyog nga pito ka mga babayeng menor de edad.
Gibutyag ni Bernales nga samtang ilang gisusi ang travel documents sa duha ka mga langyaw, ila na kining gipasakaan sa kasong Child Abuse ug Trafficking in Person.
Lakip sa ilang gipasakaan sa maong kaso ang duha ka gituohang bugaw nga silang Joseph Uy alias Kara ug Janny Avelino alias Vanessa nga parehong na-detain sa NBI.
