Nadawat sa Cagayan de Oro City Jail- Male dormitory ang Red Orchid Award 2018 gikan sa Department of Health National Office.
Mismong si Department of Health Regional Director Nimfa Torrizo ang mitunol sa maong award ngadto kag Jail Warden Supt. Erwin Kenny Ronquillo.
Mao kini ang pinaka-unang higayon nga ang tanang bilanggoan sakop sa BJMP Regional Office-10 nakadawat sa nasangpit nga award dinhi sa nasud.
Tungod sa maong pasidungog, nagpasalamat si BJMP-10 Regional Director S/Supt. Luisito Munoz sa tanang personahe sa BJMP, mga bilanggo, bisita, City Jail volunteers, Local government Units, Department of Health-10 ug uban pang stakeholders nga mitabang aron makab-ot ang maong kalampusan.
Ang Red Orchid Award mao ang tinuig nga pasidungog alang sa mga opisina ug pasilidad sa gobyerno, local government units ug hospital nga nagtumong sa pagkab-ot sa 100 percent tobacco free environment.
Maangkon lang ang maong award niadtong nakakuha sa 96 to 100 percent rating of compliance ug ikaduha niini ang Pink Orchid ug ikatulo ang White Orchid award.
Ang paghatag sa maong award subay sa lagda sa World Health Organization nga MPOWER kon Monitor tobacco use and prevention policies, Protect people from tobacco smoke, Offer help to quit tobacco use, Warn against sa dangers of tobacco, Enforce bans on tobacco advertising and Raise taxes on tobacco.
Ang maong mga criteria na-comply sa BJMP-10 hinungdan sa pagkab-ot niini sa Red Orchid Award ning tuiga.
