SYUDAD sang Iloilo – Nagpirma sang usufruct agreement nga magalawig sang 25 ka tuig ang syudad sang Iloilo kag Office of the Civil Defense para sa konstraksyon sang Regional Evacuation Center ukon REC kag warehouse.
Ginpangunahan nanday Mayor Jerry P. Treñas kag OCD-6 Regional Director Jose Roberto R. Nuñez ang pagpirma sang kasugtanan.
Patindugon ang REC kag warehouse sa 5,000 square-meter nga property sang syudad sa Tacas, Jaro.
Ang REC building kag warehouse pareho nga nagabalor sang tag P300 million.
Maka-akumodar ang REC sang isa ka gatos ka pamilya samtang ang warehouse maga-akomodar sang non-food items nga gamiton sang Department of Social Welfare and Development.
Sa ti-on nga mahuman ang REC, indi na maggamit ang mga eskwelahan bilang evacuation center nga nagasablag sa klase matapos ang kalamidad.
Nahibaluan nga may una na nga REC nga ginpatindog sa Zarraga kag San Miguel.
Photo via Iloilo City Government
