Nagpadala na og augmentation ang Regional Mobile Force sa Camp Alagar ning syudad, aron nga motabang sa kapolisan sa COCPO alang sa pagseguro sa kahapsay ug kalinaw sa katawhan sa dakbayan.
Kini aron masiguro ang kaluwasan sa katawhan, dumuduong ug mga turista, nga mosaksi sa mga nagkalain-laing kalihokan sa syudad alayon sa kapistahan ni Senior San Agustin.
Gibutyag ni COCPO Spokesperson Police Major Evan Viñas nga gawas sa Regional Mobile Force, miabag usab sa kapolisan ang Task Force Oro kung asa gideploy ang kasundalohan sa bisan asang bahin sa syudad, aron masigurong walay makalusot nga dautang elemento sama sa mga terorista nga maghimog kagubot.
Dugang pa ni Major Viñas nga nag-una sa ilang gitutokan sa hugot nga seguridad ang upat ka dagkong event sa Higalaay Festival, kung asa modagsa ang daghang tawo gikan sa mga silingang syudad, probinsya ilabina ang mga turista.
