Makato, Aklan – Gusto makaron nga pa imbestigahan it Sangguniang Bayan kung Makato sa Commission on Audit (COA) rong ginpatigayon nga renovation it Public Market.
Suno kay Vice Mayor Bob Augusto Legaspi nga nauna eon nga ginpundohan rong renovation it P 5 milyon pesos pero uwa raya matapos.
Indi suno kana sanda makapati nga naubos rong nasambit nga pundo pero uwa man it haeos nakita nga pagbag-o sa tindahan.
Sa makaron hay uman nga nagrequest it pondo si Mayor Abencio Torres nga P 2.5 milyon para sa kueang agod nga mapadayon rong renovation pero uwa pa raya gin aprobahan it Sangguniang Bayan.
Suno kay Mayor Torres nga napundo rong renovation it nasambit nga tindahan bangud sa kapaslawan ko mga miyembro it Sangguniang Bayan nga taw-an it sabat ro andang hinyo nga dugang nga pundo.
Kompleto man suno kana ro mga dukomento nga kinahangeanon para sa andang hinyo nga dugang nga pundo kung sa siin ro supplemental budget kunta ro andang paga gamiton kara.
Sambilog man nga ginapanan-aw nga dahilan ni Mayor Torres hay bangud sa pulitika rason nga uwa raya pag aprobahe.
Pero sa pihak kara, padayon man gihapon imaw nga nagahimo it pamaagi para nga madayon rong renovation.
Samtang sa pihak nga parte, sa ginpatihayon nga session it Makato Sangguniang Bayan kahapon, hugot nga ginpamalibaran ni Vice Mayor Bob Augusto Legaspi rong akusasyon ni Mayor Abencio Torres nga pulitika rong rason ag ginabaeabagan ham-an uwa nanda pag aprobahe rong ginapangayo nga dugang nga pundo para sa renovation it Makato Public Market.
Suno kana nga una eong ginpangako ni Mayor Torres nga matapos rong renovation it tindahan bago mag Ati-atihan pero naubos eang rong P 5 milyon ag uwa pa raya natapos.
Aminado man imaw nga rong mayoriya it miyembro kung Sangguniang Bayan hay kaapin nanda pero bukon it boot hambaeon suno kana nga gamiton nanda raya para baeabagan ro hinyo nga dugang pondo para sa renovation ag sa iba pang proyekto kapin kung sa ikamayad man it banwa.
📷:Skyscrapercity Aklan
