Rice warehouse inspection suportado

33

Davao City – Daghan na sa yanong mga lungsuranon karon ang mitiyabaw gumikan sa kamahal sa bugas karon nunot sa rice shortage ug epekto sa pagsaka sa produktong petrolyo sa atong nasud karon.

Gikalipay karon ni Nagkaisa Labor Coalition Convenor Mike Ybanez ang kasuguan ni Pangulong Duterte kay sa mao nga paagi masuta na gayod ang mga negosyanteng hasta katikasan sa negosyo sa bugas.

Ang pagkuwang sa suplay sa bugas tungod sa pagkahurot sa NFA rice sa nakalabay nga mga buwan usa sa mga gitumbok nga hinungdan ngano misutoy ang presyo sa bugas sa mga merkado karon.

Nadiskubrehan ni Pres. Rodrigo Duterte nga adunay dagkung mga negosyante og bugas nga gatago og bugas sa ilang mga bodega aron lang mugawas ang artificial rice shortage sa tibuok nasud.

Diin kini nagpakita lang nga tinuod gayod ang pagduda nga gisabotahe ang suplay ug gimanipular sa mga negosyante ang presyo sa bugas aron muburot pa ang ilang mga bulsa sa kadako sa ginansiya.

Busa gidayeg sa hut-ong sa mga mamumuo ang kamandoan ni Pres. Rodrigo Duterte nga paablihan ang bodega sa mga rice traders aron masuta kun duna bay pagtago sa suplay sa bugas sa nasud.

Giingon ni Ybanez nga nanghinobra na ang mga negosyante sa ilang katikasan ug panahon na kini tuldukan ug ma-undang ang sabotahe ug manipulasyon sa suplay ug sa presyo sa bugas sa mga merkado.

Buot ni Ybanez nga masilotan na kining mga negosyante nga walay kaluoy sa yanong mga lungsuranon nga nag-ilaid sa tumang kalisod ug mas gipasamotan pa sa mga rice traders tungod sa sabotahe nga ilang gihimo.

Awhag pa ni Ybanez kang Pres. Duterte nga i-imposar ang balaod ug silotan ug bilanggoon ang mga negosyanteng masakpan ug mapamatud-an nga nagtago og stock sa bugas sa ilang mga bodega.

RadyoMaN Joel Viray

Facebook Comments