Patay ang isa ka drug surrenderee sa banwa sang San Enrique, Iloilo matapos gintiro sang gina alegar riding-in-tandem takna alas singko kaina sang hapon sa Barangay Dacal, San Enrique .
Madamo nga kapilasan ang naangkon sang biktima nga ginkilala kay Jay Balboa alyas Small, 33-anyos kag tumandok sang Barangay Abaca sa nasambit man nga banwa.
Ginpahayag ni Senior Inspector Fernando Punsalan, hepe sang San Enrique PNP nga naghalin sa Passi City ang biktima kag pauli na kuntani sang ginluthang sang wala pa nakilala nga suspetsado.
Nagtinguha pa si Balboa nga malagyo apang liwat ini nga gintiro sang suspek kag naigo gid sa ulo nga nangin kabangdanan sang iya kamatayon.
Nahibaluan nga naga biyahe sang roving nga may sidecar ang biktima kag may asawa kag kabataan.
Padayon pa ang imbestigasyon sang San Enrique PNP sa nasambit nga insidente kag wala pa sang narecover ang kapulisan sa ginluntaran sang krimen.
