By: Joanna Ricote
Mikabat sa 5,679 pesos ang gihatud nga tabang sa RMN-dxCC, alang sa pamilya sa usa ka tuig nga bata nga gipatay sa kaugalingon nga inahan.
Ang maong kantidad, gikan sa mga tig paminaw sa DXCC, nga natandog ang mga kasing-kasing human nga nahinabi ni RadyoMan Zaldy Ocon, ang amahan sa maong bata ug ang suspect nga mao ang inahan niini.
Matud ni Police Senior Inspector Marlo Lanioso, ang Chief of Police sa Manticao Municipal Police Station, nga nahitabo ang insidente niadtong March 3 ug kagahapon gipasaka na ang kasong parricide batok sa inahan.
Naila ang suspect nga si Salvacion Binas Kimanhan, nga maoy mipatay sa usa ka tuig nga anak nga si Ayesha Celen.
Nagtuo ang kapulisan nga adunay sakit sa panghuna-huna ang suspect, gumikan kay gidala niini ang iyang anak gikan sa ilang bahay padulong sa sagingan og didto gibunalan og puthaw ug gibundakan sa bato ang ulo sa bata nga hinungdan sa iyang kamatayon.
Gilantaw usab sa kapulisan ang angulo nga posibleng nagpaboang-boang ang suspect.
Matud ni Senior Inspector Lanioso, nga unusual ang gihimo sa inahan ngadto sa iyang anak, ilabina kung ang tumong niini mao ang pag disiplina.
Apan matud sa suspect, nga napatay niini ang iyang anak gumikan sa iyang kahadlok human kini gihulga sa iyang bana nga dad-on sa Marawi City.
Apan hugot kini nga gipanghimakak sa asawa nga si Rey Boy Kimanhan, gumikan kay sa wala pa nahitabo ang insidente, namatikdan niini ang iyang asawa nga dili makatulog.
Gumikan niini, nanawagan si Rey Boy Kimanhan, sa mga tigpaminaw sa DXCC nga tabangan kini nga mapalubong ang iyang anak karong adlawa, hinungdan nga gihatud karong adlawa ang maong kantidad lakip na ang usa ka sakong bugas didto sa Manticao Misamis Oriental.
