Davao City – Patay ang usa ka ulitawo human kini misukol sa gilusad nga operasyon sa kapulisan alas 8:40 kagabii sa Bankerohan Public Market.
Sa record sa Davao City Police Office, giila ang namatay nga si Jason Flores Gomez, 18 anyos, ulitawo ug residente sa Lower Madapo, Brgy. 5-A, Bankerohan ning syudad sa Davao.
Sumala pa una matigayon ang insidente, usa ka pagpanulis sa usa ka wala mailhing lalaki ang nahitabo alas 5:40 kagahapon diin ang biktima giila nga si Louella Felicidad Binasbas, 26 anyos, residente sa Tacurong, Sultan Kudarat, samtang siya nagbaktas sa Bankerohan Public Market.
Sa dihang gisusi sa rogues gallery sa kapulisan, positibong giila sa biktima ang suspect nga si Jason Gomez diin nasayran nga naaresto na kini sa kasong pagpangawat ug pagpamukbok.
Atol sa gilusad nga joint operation sa Sta. Ana ug San Pedro PNP, arestohon na unta si Gomez apan kalit kining mihulbot og .38 kalibre sa rebolber ug isip depensa sa kapulisan napusilan ang suspek rason sa pagka-neutralisa niini.
Narekober sa crime scene ang .38 kalibre sa rebolber nga walay serialnumber lakip ang lima ka mga buhing-bala, tulo ka gipabutong cartridge case of .9mm pistol ug sling bag nga adunay pinaugang marijuana.
Gisulayan pa og tabang si Gomez apan pag-abot sa Southern Philippines Medical Center (SPMC) gideklara kining dead on arrival ni Dr. Anthony Araneta alas 9:53 sa parehong adlaw.
RadyoMaN Jason Amisola
