General Santos City—Gimando na ni Philippine National Police (PNP) Chief Director General Oscar Albayalde ngadto kang PRO-12 Regional Director Marcelo Morales nga tangtangon sa serbisyo ang mga pulis nga nagpositibo sa iligal nga droga sa rehiyon-12.
Gihingusgan ni Albayalde nga walay luna sa han-ay sa kapulisan ang mga badlungon nga mga pulis hilabi na ang mga lambigit sa illegal drugs.
Giklaro pa sa opsiyal nga dili niya itolerate ang samang gimbuhaton sa mga pulis tungod usa kini matud pa sa iyang kampanya sa pagtul-id sa han-ay sa kapulisan ug kabahin sa gipatumang internal cleansing ug internal discipline sa PNP.
Nasayran nga usa kini sa gihisgutan atol sa gihimong Close door meeting uban ang mga Provincial ug City PNP director sa Rehiyon -12 niadtong adlawng Lunes atol sa paghidangat sa labaw sa kapulisan sa nasud sa rehiyon.
