Hangtud nga dili kita makadiskubre ug atong kaugalingong tinubdan sa lana, magpabilin nga ang Pilipinas bihag sa langyaw’ng tinubdan sa krudo sama sa Organization of Petroleum Exporting Countries (OPEC).
Sa usaka presser, giklaro karon ni Presidential Spokesperson Harry Roque nga aron makalingkawas kita gikan sa pagkahigot kun pagkagapos sa foreign oil, urgent kaayo karon nga tun-an nato asa kita makakaplag ug laing tinubdan sa crude oil kun krudo nga maoy primary source sa gasolina, diesel, kerosene ingon man Liquefied Petroleum Gas kun LPG.
Matud ni Roque, kritikal karon nga ipadayon na ang joint exploration sa natural gas diha sa may West Philippine Sea uban sa China kinsa abli nga makighiusa kanato sa pag-explore sa natural gas sa maong waterways sa 60-40 sharing agreement.
Ang West Philippine Sea fuel source maoy gilaumang panghulip sa atong nag-inusarang tinubdan sa sugnod karon nga mao ang Malampanya oil grid apan kansang ‘peak supply’ gikabalak-ang mahurot na by 2022-2032.
Ang Pilipinas gitawag nga usaka oil importer kansang ekonomiya nabutang karon sa tumang kadelikado ilabi na nga anaa na sa $83 US per barrel ang oil diin hapit na kining moabot sa $87 per barrel nga ‘threshold or near-crisis level’ gumikan sa external factors sama sa reduced OPEC oil production, pagsaka sa atong interest rates ingon man ang geopolitical conflicts kun away sa mga kanasuran sa Middle East lakip ang mga allies sa dagkung oil-producing states sama sa Kingdom of Saudi Arabia, Libya, Iran, Iraq ug uban pa.
Sa pikas bahin, nagkaanam kadaghan karon ang nisugyot nga panahon na nga atong banhawon ang mothballed Morong Bataan Nuclear Power Plant sanglit kini ang sagad fuel source karon sa mga progresibong demokrasya sa kalibutan.
Kun mosaka ang oil pricing level, mosunod usab ang pag-increase sa presyo sa mga basic goods and prime commodities and services.
RadyoMaN June Duterte
