Sa boto na 6 an pabor ug 4 an kontra, Atty. Jerry Centro na-concur an appointment isip City Administrator nan Surigao
Na-concur na an appointment ni Atty. Jerry Centro isip City Administrator ini human an pagbinotohay na 6 an mipabor ug 4 an mialkontra. Ini sa dihang tagpahigayon an regular na session kaganina nan Sangguniang Panlungsod.
Una na mipaabot sa ija pag-object si City Councilor Baltazar Abian ugsa miresulta sa pagbinotohay. An mga mipabor naglangkob sa ila ni City Councilors Victor Borja, Sim Castrence, Kent Yuipco, Ernest Matugas, Jose Edradan Jr. ug ABC Pres. Pablo Bono Jr. An mga mialkontra amo sila ni City Councilors Perfecto Consigo, Fernando Almeda III, Christian Noel Catre ug Baltazar Abian.
Milungtad nan hapit isa ka oras an pag-sukit-sukit ngadto kan Atty. Centro kalabot sa qualipikasyon niini lakip an kaso na una na tagsang-at batok sa ija. Tagpaabot isab didto an pagpangutana nan Presiding Officer na si Vice Mayor Alfonso Casurra kon uno an nahimong basehan ni Atty. Centro sa mga akusasyon adton 2013 na eleksiyon pareho sa pasangil na nanag-ija sija nan mansiyon sa Bacolod ug Cebu City, lakip matud pa may property sa Estados Unidos, dugang pa an alegasyon sa pagpangilog sa lupa sa Mariano Memoral Central Elem. School o MEMCES. Ini sumaya pa wayay katinuoran ugani namatay an ija inahan na bug-at an kasing-kasing sa mga akusasyon na waya nila himo-a.
Agig reaksiyon, tagpaklaro ni Atty. Centro na waya sija makadumdum na tag-akusahan nija an Bise Mayor sa mga mansiyon gumikan kay an ija tagpadayag kabahin sa Fertlizer Scam na an basehan nija an report nan Commission on Audit ug Task Force Abono.
