i Balita
March 08, 2020
(Photo from web)
SALAMAT SA FACEBOOK! | MATAPOS ANG 30 KA TUIG NGA NAGBULAGAY, MAG-UTOD LIWAT NGA MAGAKITA-AY
SYUDAD sang Iloilo – Natuman ang handum sang sadto isa ka tuig pa lang nga bata nga makilala ang iya ginakahidlawan nga kauturan nga nabilin diri sa Iloilo sang nagbulagay ang ila ginikanan.
Isa ka tuig pa lang sadto si Riza Cajas Plaza sang gindala siya sang iya iloy nga si Nena Cajas Plaza sa Zamboanga del Norte matapos mag-away kag magbulagay ang iya ginikanan.
Sadto pa lang, handum na ni Riza nga liwat makita kag makaupod ang iya amay kag duha ka utod.
Sang Marso 2, ginpanawagan paagi sa RMN Iloilo facebook page ni Riza ang iya mga nabilin nga pamilya diri sa Iloilo.
Matapos ang 25 lang ka minutos, natuman ang 30 ka tuig nga handum ni Riza sa diin nacontact kag natultulan ang ginapuy-an sang iya amay kag mga utod diri sa Iloilo.
Sa bulig sang social media, emosyonal nga nagkilalahay ang mag-utod nga nabulag sa isa kag isa sa sulod sang 30 anyos.
Naestorya ni Riza ang iya utod nga si Ribonie kag iya nahibaluan nga napatay na ang ila amay kag ang isa pa ka utod nga si Renalie.
Apesar sini, plano ni Riza nga magpadulong sa Acuit, Barotac Nuevo upod ang iya iloy agud personal nga makita ang iya nabilin nga utod nga si Ribonie.
Lubos ang pagpasalamat ni Riza Cajas Plaza nga paagi sa RMN Iloilo facebook page natuman ang iya handum.
“Masaya po at medyo excited. Lalo na po nagpapasalamat po ako sa inyo sa RMN Iloilo. Nagpapasalamat po talaga ako sa inyo dahil tinulungan niyo po ako. At sa mga taong tumulong po sa akin, maraming salamat. Sana po matulungan niyo ako na makapunta talaga dyan sa kapatid ko,” ang emosyonal nga pahayag ni Riza sa interview sang RMN Iloilo.
Magabulig naman ang RMN Iloilo agud makapauli ang mag-iloy diri sa Barotac Nuevo.
