Sapa nga mo-overflow sa dalan sa Compostela, gipanawagan nga maaksyonan

Davao City – Nanawagan karon ang usa magtutudlo nga matagad ang sitwasyon sa usa ka dalan sa Sitio Lubog, Barangay Ngan, Compostela, Davao de Oro, human nga naga-overflow ang sapa sa maong lugar panahon nga adunay masinatiang pag-ulan.

Sa interbyu sa DXDC RMN Davao kang Ronie Guay, magtutudlo sa Ngan Elementary School sa Compostela, gibutyag niini nga 14 sila ka mga magtutudlo ang apektado pasulod sa eskwelahan panahon nga naga-awas ang maong sapa.

Dugang ni Guay nga apektado usab ang mga estudyante nga kinahanglang muagi sa maong dalan padulong ug pauli sa eskwelahan panahon sa pag-ulan.

“Every time mokusog ang ulan, mubaha jud ning sapaa. Dili ‘mi katabok. Amoa sang pagamayon. Delikado kaayo ug ma-timingan nga inig labay maoy pagbulho sa tubig,” saysay ni Guay.

Nanghinaut ang magtutudlo nga maaksyonan kini sa Local Government Unit (LGU) Compostela aron nga malikayan ang unsa mang disgrasya o insidente ilabi na kung dili maayo ang dagan sa panahon sa lugar.

RadyoMaN Kirby Manzon