General Santos City—Gikumperma ni Police Lt. Col. Teody Condeza, Spokesperson sa Sarangani Provincial Police Office nga sakop sa PPO-Sarangani ang usa sa duha ka Police nga una nang nadismiss sa serbisyo gumikan na usab sa pag apil apil sa sabong.
Matud sa opisyal nga mismong si PRO-12 Regional Director Breg. General Alfred Corpus ang nag dismiss sa mga nasampit.
Nasayran nga nakaabot sa National Headquarters ang paglambigit sa duha ka mga police sa Rehiyon 12 ngadto sa sabong mao nga sila gipailawom sa imbistigasyon nga misangko sa pagtanggal kanila sa serbisyo.
Aminado si Condesa nga nakahatag ug kaulaw alang kanila ang gihimo sa maong Police.
Apan sumala pa personal man niini kining binuhatan ug walay labot ang mga Police sa Sarangani nga nagtinarong sa ilang trabaho.
Gikadismaya lang ni Condesa ang gihimo sa maong Police tungod luyo sa ilang pagpahimangno sa tanang police nga nakabase sa probinsya nga dili makiglambigit sa unsa mang iligal nga gimbuhaton apil na sa unsa mang matang sa sugal, gihimo gihapon niini ang ingon.
Samtang nagdumili una si Condesa nga nganlan ang Police nga gidismiss, apan gibutyag niini nga usa kini ka opisyal nga adunay ranggo nga major.
Iya pang gihuwat ang derektiba sa labaw sa kapulisan sa Sarangani nga si Police Col. Lex Ephraim Corpuz Gurat, kung mamahimo na bang nganlan ang gitanggal nga Police.
Gikumperma usab ni Condesa nga nakasumite na sa iyang apila ang maong Police kabahin na sa desisyong pagdismiss ngadto kaniya.
