Davao City – Hatagan og dakong prayoridad ni Davao City Mayor-elect Sara Duterte-Carpio ang panglawas sa katawhan ug alibyohan ang kapobrehon dinhi sa syudad.
Kini human subling midaug siya isip pagka-mayor sa Davao niadtong May 13 Midterm Election diin mao na kini ang iyang ikaduhang termino sa maong katungdanan.
Sumala ni Mayor Inday nga ginapanigkamotan nila karon nga magtukod og ospital ug ubang gikinahanglang pasilidad sa gobyerno ngadto sa mga hilit nga lugar aron dili na manginahanglan pang mubaba sa downtown area ang publiko.
Target usab sa iyang liderato nga magmontar og usa ka ‘Botika ng Bayan’ sa 17 ka mga health districts alang sa hinanaling access sa publiko sa gikinahanglang mga tambal.
Sa pagkakaron, adunay lima ka mga ‘Botika ng Bayan’ dinhi sa Davao partikular sa Lingap Compound tabuk lamang sa Southern Philippines Medical Center (SPMC), Calinan District, Poblacion, Toril ug Bunawan Districts.
Kahinumdoman nga niadtong 2016 atol sa iyang paglingkod isip mayor, gi-identipika niini ang iyang 10-point priority agenda diin kini gilangkuban sa poverty alleviation, infrastructure development, solid waste management, health, education, agriculture, tourism, transportation planning and traffic management, peace and order ug disaster risk reduction and mitigation.
RadyoMaN Jason Amisola
