General Santos City— Nagpahigayon na ug command conference ang Gensan City Police Office sa pagpanguna ni Police Senior Superintendent Romeo Ruel Berango, Acting City Director sa GSCPO uban ang Joint Task Force Gensan ilawom sa superivision ni Col. Adonis Bajao, ang commanding officer ug uban ang mga force multiplier alang umaabot nga ika-40 ka tuig nga kasaulugan sa pista ni Sr. Sto. Niño partikular na sa Brgy. Bula.
Sumala kang Police Superintendent Roel Sermese, Deputy City Director For Operations nga maximum security ang ipatuman sa Brgy. Bula gumikan sa gilaumang bagang duot sa katawhan, lokal man o dayo.
Pamahayag niini nga mismong si Police Chief Inspector Bryan O’niel Salvacion, hepe sa Police Station 6 maoy milatag sa ipatumang security plan gumikan ilawom man sa iyahang area of responsibility ang Brgy. Bula samtang ang GSCPo ang andam nga muhatag ug dugang pwersa.
Dako man usab ang panghinaut ni Superintendent Sermese nga walay maitalang bisan unsang kakuliang sa maong okasyon bisan pa man ug daghang bisita ang gilauman sa Brgy. Bula.
Kahibaluan nga karong umaabot nga petsa 15 ning bulan sa Enero ginasaulog sa Brgy. Bula ang kapistahan ni Sr. Sto. Niño dungan sa float parade sa kadagatan isip pagpasalamat sa idustriya sa panagat.
