KABANKALAN CITY, NEGROS OCCIDENTAL – ( UPDATE ) Ginapanindugan ni Rosalie Flores, 47 anyos, suspek nga nagtiro patay sa iya ka live in nga si Felicimo Marquez, 49 anyos nga “self defense” gid lamang ang natabo kon ngaa iya natiruhan ang biktima sadtong Lunes sang gab-i, Oktubre 8 sa Brgy. Bantayan, Kabankalan City.
Sa interview sang DYHB, ginpahayag ni Rosalie nga hubog nga nagpauli sang amo nga gab-i si Felicimo kag gilayon ini nagpangita sang sud-an sa panyapon.
Suno sa suspek, nagaprito pa siya sang isda sang ginhambalan ni Felicimo nga luyag sini magluto sang iban pa gid nga sud-an kag didto nagsugod ang ila paglinalisay tubtub nga nag-intra na ang manak sang biktima nga si Mark Anthony Flores.
Pahayag ni Rosalie nga nagkuha sang handle sang mop kag binangon si Felicimo apang ini ang iya naagaw.
Sang nakita naman sang biktima ang martilyo ini ang iya ginkuha kag gin-lampusan ang asawa sang iya manak nga si Shane Flores nga nagabusong naman sang lima ka bulan.
Didto na kag nagbato si Mark Anthony kag ini sila ang nagpukutay.
Siling ni Rosalie nga sa amo nga tion ang hitsura sang biktima ang kaangay sang “ido-buang” nga indi na nila masarangan nga tambagan bangud tuman ka kusog.
Bangud sini, ginsiling ni Rosalie nga ginkuha na lamang niya ang armas ni Felicimo nga .357 nga nakatungtong sa ibabaw sang TV kag una nga nagpasalba para lang kuntani mapa untat ang biktima.
Apang wala ini nagpatambag rason nga napilitan si Rosalie suno sa iya nga ini ang tiruhon na lang.
Nahibaluan nga sanday Rosalie kag Felicimo ang magpaka-isahay bangud nga mag-utod ang ila sini iloy.
May asawa ang lalaki nga ginkilala kay Elena kag tatlo ka mga kabataan apang ginbyaan nya ini mga lima na katuig ang nakaligad kag nagpuyo sa iya pakaisa nga may tatlo man ka mga kabataan.
Suno sa asawa, desidido gid sila nga ifile ang kaso kontra sa babaye bangod sa iya pagkahibalo mabuot kag wala sang gamo ang iya bana kon wala manlang ginadaug daug.
