Kalibo, Aklan — Bilang kaparte ko paglimyo it kilaeang isla nga Boracay nga nauna eon nga ginpuna ni Pangueong Rodrigo Duterte sa pagiging “cesspool” bangud sa bukon it maayos nga sewage system, gin umpisahan eon nga iserbe ko mga taga Department of Environment and Natural Resources (DENR) 6 sa mga daeagko nga hotel ag resorts sa isla nga nagpatindog it andang mga istruktura sa bukid nga parte kahapon rong show cause order.
Sa siyam ka mga daeagko nga establisimyento nga gin isyuhan it show cause order hay sambilog eamang rong nag perma.
Una nga nakitaan it bayolasyon ro sangka high-end resort sa tunga it bukid nga parte it isla kung sa siin makita man sa sueod rong maeapad nga golf course.
Masunod rong nagapadayon nga konstruksyon it sangka mabahoe nga hotel sa ibabaw it Mt. Luho nga suno sa DENR hay haeos ginsakop it hotel ro pila ka parte it 400 nga ektaryang bukid.
Samtang, daywa pang resort rong gin isyuhan it notice of violation kung DENR Environmental Management Bureau ag Local Government Unit sa Brgy. Balabag matapos madiskubrehan nga naga pilak it higko sa drainage cana it isla.
Sangka linya man halin sa septic tank rong nadiskubrehan ko mga taga LGU Malay sa ginhimo nga random inspection sa sewerage line it mga establisimyento sa Boracay.
Pagapasakaan mat-a it kasong pagbayolar sa Clean Water Act rong mga nadakpang may illegal connection sa drainage system .
