General Santos City— dakpan sa gipahigayong buybust operation sa Police Station 4 ang usa sikad driver alas 12 pasado ang takna sa udto sa may Montossorri Road,Prk. Malakas, Brgy. San Isidro ning dakbayan.
Giila ni Police Senior Inspector Lemuel Enrijo, Deputy Station Commander sa Police Station 4 ang suspek nga si Erwin Bales, 30 anyos nga residente sa Daroy Compound, Prk. Malakas, Brgy. San Isidro ning dakbayan.
Nakuha gikan sa iyahang posisyon ang usa ka sachet nga buybust item, 500 ka pesos nga mark money ug laing usa ka sachet sa gituuhang shabu. Dugang pamahayag ni PSI Enrijo nga kumpirmadong gapamaligyaan ug illegal nga droga ang suspek kung asa sagad sa mga lambigit niini mao ang mga trisikad driver.
Pamahayag niya nga wala sa ilahang watchlist ang suspek ug wala usab kini sa ilahang listahan sa mga nagsurender kaniadto apan ang maong operasyon ang resulta matud pa sa impormasyon nga gihatag usab sa ilahang mga naunang dinakpan.
Kalabot niini, gibutyag ni PSI Enrijo nga normal lang alang sa mga dinakpan nga manghimakak nga lambigit sila sa illegal nga aktibidad aron ma-abswelto sa kaso. Pagpaklaro niini nga walay pagpanananom sa illegal nga droga ang kapulisan sa ginahimo nga mga operasyon.
Kung asa gibutyag niini nga human gipatas-an ang binulang sweldo sa kapulisan, wala matud pay rason aron nga dili nila himuon ug sakto ang ilahang trabaho.
