Sa inisyal nga imbestigasyon sa kapulisan, nalumos ang biktima apan dili kumbinsido ang pamilya tungod kay nakitaan og bun-og sa lawas ug wala usab miburot ang lawas sa biktima kung kini nalumos man.
Tungod niini, ipailawom sa autopsy karong adlawa (Oktubre 27, 2022) si Arnold Masamloc, ang 28 anyos nga singer nga taga Matanao, Davao del Sur nga nagpalgang patay sa Bansalan.
Sa interbyu sa DXDC RMN Davao kang Patrolman Vanessa Piñero, personahe sa Bansalan Municipal Police Station (MPS), gisaysay niini nga aron masayran ang tinuod nga nahitabo sa biktima ipailawom kini sa otopsiya.
“Para mas maklaro kung unsa gyud ang iyang gikamatyan gyud, para ma-stop pud ang mga wrong nga (impormasyon), hulaton nalang gyud nato ang autopsy report,” matud sa pulis.
Ulahing nakit-an ang biktima sakay sa iyang motor gikan naghatud og pasahero apan wala na kini nakauli sa ilang balay sa Matanao sa maong adlaw.
RadyoMaN Kirby Manzon
