Gi-awhag sa Criminal Investigation and Detection Group kon CIDG Bukidnon ang tanan kanhi inmates nga nabuhian sa Davao Penal Colony, tungod sa Good Conduct Time Allowance Law, nga mutahan sa otoridad.
Sa interview sa RMN Malaybalay ngadto kang Police Major Edgardo Bernardo, ang provincial officer sa CIDG Bukidnon gibutyag niini nga nanawagan sila sa mga silingan, ka-barangay ug kaila sa mga kanhi inmates nga konbiktado sa ngilngig nga krimen ug nakagawas sa GCTA law nga mutahan na ngadto kanila o sa labing duol nga police station o kaha sa mga barangay opisyal sa probinsya sa Bukidnon.
Nasayran nga tracker team ug lead unit ang CIDG aron madakpan ang mga bilanggong nahatagan sa Good Conduct Time Allowance nga dili mosurender sa sulod sa 15 ka adlaw nga gihatan ni Pangulong Rodrigo Duterte.
Matud ni Major Bernardo nga dinhi sa Bukidnon mukabat ngadto sa 25 kapin kon kulang ka mga heinous crime convicts ang nakagawas tungod sa GCTA law.
Gisiguro usab sa CIDG nga andam silang mutabang niadtong mutahan.
Nasayran nga gibisitahan sa CIDG, HPG ug kapulisan ang tagsa-tagsa ka mga panimalay sa maong mga kanhi inmate aron awhagon nga mutahan sa otoridad.
Gipahinumdom usab ni Major Edgardo ang Ignorance of the Law Excuses No One.
