![DRUGS](https://i0.wp.com/rmn.ph/wp-content/uploads/2017/08/DRUGS.jpg?resize=696%2C340&ssl=1)
Davao City – Lawom ug dili yanong solusyon ang atong gikinahanglan aron pagsulbad sa suliran sa droga sa nasud nga daw kanser na nga nikankan sa nagkadaiyang parte sa atong katilingban kun body politic.
Mga katawhang gikonsulta sa programang ‘Straight to the Point’ sa RMN DXDC Davao nipadayag sa ilang mga punto de vista ug panahum sa pangutana: Unsa kaha ang ilang ikasulti niining latest anti-drug operations diin sunod-sunod ang pagkatikangkang niadtong mga suspetsadong nisukol sa mga awtoridad atol sa Oplan Galugad, Oplan Bulabog ug Double Barrel Reloaded?
Mayoriya sa gihapon nagbaton sa opinyon nga ang Duterte war on drugs angay lamang nga suportahan sanglit ang benepisyo sa kalampusan sa atong drug war matagamtaman man unya sa tanan.
Hinoon, nilutaw usab ang usaka panglantaw nga sa pag-discharge sa ilang police functions, ang mga tinugyanan sa balaud angay nga dili mahilayo gikan sa pagtamod sa hustong balaud kun ‘rule of law’ ingon man ang pagtahud sa ‘judicial processes’ diin bisan kinsang akusado lantawon una nga inosente ‘until otherwise proven guilty by a competent court of law or justice.’
Kontra-balanseng punto nag-focus diha sa panawagan kun hagit sa katawhan ngadto sa tanang mga drug financiers, manufacturers, traffickers, protectors, pushers ug users nga biyaan na sa hingpit ang maong dautang binuhatan una pa man masusama sa kaso ni Kian Loyd delos Santos, 17 anyos nga Grade 11 student nga napatay atol sa drug raid sa Caloocan.
Kasamang June Duterte