Nagagwa nga ang South Cotabato ang may pinakamanubo sa subong nga buying price sang palay sa rehiyon base sa datos nga ginpresentar sang Department of Agriculture 12 sa ginpatigayon nila nga pagsinapol sang Miyerkules nga adlaw upod ang mga irrigators association, farmers leaders, National Irrigation Administration kag National Food Authority 12.
Sa monitoring sang NFA 12 yara lang sa P14.50 ang buying price sang wet nga palay sa banwa sang Tantangan kag P15.00 lang ang dry, apang sa kabug-usan nga probinsya sang South Cotabato yara sa P15.00 ang wet, P16.00 ang dry nga palay, sa North Cotabato kag Saranggani Province P17.00 ang wet, P17.50 ang dry, sa Sultan Kudarat P16.00 ang wet, P17.00 ang dry nga gin-almahan sang mga mangunguma.
Ginalantaw naman nga rason ni NFA Regional Director Dianne Silva, nga ang pagnubo sang buying price sang palay ang tungod sa madamo nga supply sa subong kag indi ang pagbaha sang imported rice tungod ini ang para lamang sa food security kag kalamidad.
Base sa datos sang NFA yara sa 60,000 ka bags sang imported rice ang kabug-usan nga magaabot sa South Cotabato subong nga bulan sang Enero kag Pebrero, sa Sultan Kudarat 100,000 bags kag sa North Cotabato 120,000 bags.
Indi naman suno pa kontrolado sang gobyerno ang presyuhanay sang palay bangud free trade na suno pa ang Pilipinas kag indi man mapunggan ang mga traders kon luyag sang mag ini nga magbakal sang imported rice.
Ang mahimo gid lamang suno pa sang NFA amo ang magpatunga kag hatagan ang mga mangunguma sang maayo nga presyo amo nga ginapasanyog nila ang procurement operation paagi sa pagpalapta sang mga palay buying stations kag indi na istrikto pa sa requirements sa pagpamakal sang produkto sang mga mangunguma.
Sa subong ang buying price sang NFA ang yara sa P21.00 kada kilo kon dry sa diin ang basic cost P17.00 plus .20 sentimos nga drying kag tracking, plus P3.00 nga bufferstocking incentive kon sa individual kag sa cooperatiba naman may dugang pa nga .30 sentimos nga CDIF.
