Mga BHW sa South Cotabato indi basta nga kakason sang barangay Kapitan sa tion nga maaprobahan na ang ordinansa sang Sangguniang Panlalawigan.

4

Indi na basta nga makakas sang Kapitan ang barangay health workers kon may pagbag-o sa administrasyon ilabi na yadtong nakainvest na ang gobyerno sa mga ini sa pagpaidalom sa ila sa training
Ini sa tion suno kay Board Member Ellen Grace Subere Albios, Chairperson sang Committee on Health sang Sangguniang Panlalawigan nga maaprobahan ang ginaduso niya nga Ordinance Setting Guidelines and Institutionalizing the Qualifications of Barangay Health Workers in the Province of South Cotabato and Providing Funds thereof.
Samtang, base sa ordinansa makansela lamang ang accredition sang isa ka BHW kon nagapangatubang sang serious misconduct or wilful disobedience, gross habitual neglect of duties, kon naglab-ot na sa 60-anyos, indi na fit sa trabaho, napaslawan nga magcoordinate kag submitir sang quarterly reports base sa kamanduan sang rural health midwife kag napaslawan nga magcomply sang requirements para sa renewal sang accredition.
Apang ini ang kinahanglan nga mag-agi sa nagakaigo nga imbestigasyon sang municipal kag city health officer nga ang rekomendasyon naman ang i-indorso sa city kag municipal health board nga amo ang maghimo sang desisyon.
Sang Lunes nga adlaw nila nga regular session suno kay Albios aprobado na sa second reading ang nasambit nga ordinansa nga kon maaprobahan sa final reading pagka-Pebrero ipatuman na ang nasambit nga balaud.
Apang ginpaklaro sang opisyal nga mag-epektibo ang pagset sang qualifications sa mga bag-o magsulod nga bhw nga dapat 18 years old pataas, high school ukon ALS graduate,residente sang barangay sa sulod sang tatlo ka tuig, good moral character nga certified sang Rural Health Midwife, dapat nakapaidalom sa basic training nga inisyatibo sang Department of Health sang Local Government Units, samtang pahanugutan man nga BHW ang IPS basta high school level.
May-angot sini, halin sa P300.00 kada bulan nga honorarium nga halin sa provincial government mahimo na ini nga P400.00 kada bulan magluwas pa sa ginahatag sang barangay kag tagsa sini ka mga municipal kag city government.
Ginhimo ang nasambit nga ordinansa tungod ang mga BHW ang masami nga fronti sa implementasyon sang mga health programs sa tagsa sini ka mga barangay nga sa subong nagalab-ot na ang mga ini sa 2,012 sa bug-os nga probinsya.

Facebook Comments