Kalibo, Aklan – Ging hibaeo it Aklan Sangguniang Panlalawigan ro preventive measures nga
ginapatiigayon it provincial government kontra COVID-19 kamana man ro presenting estado sa Aklan it nasambit nga kinakakoebaan nga virus.
Ging imbitahan sa legislative inquiry ro taga Civil Aviation Authority of the Philippines, Philippine Coast Guard, managers it Kalibo ag Caticlan airport, Bureau of Immigration, Provincial Health Office, mga Municipal Health Officers, Municipal Mayors ag iba pa.
Suno kay Dr. Cornelio Cuachon Jr. Provincial Health Officer I it PHO-Aklan, tanan nga mga Chinese tourists nga andang ging paidaeum sa persons under investigation ag persons under monitoring particular ro mga turista nga may travel history sa mga COVID-19 infected cities sa China ag mga nagka close contact sa mga Chinese nga konpirmadong may COVID-19 nagnegatibo sa virus.
Suno mat-a kay Paulo Cartagena, Immigration Office it BID Aklan, nagbalik eon ro Taiwan flights ko March 1, 2020 kon siin pakatumanon nanda ro pangabay it SP sa pag establisar it protocols kontra COVID-19.
Nagpahayag mat-a si Dr. Cuachon, kaparti ko andang gina obrang prevention ro pagbooe it temperature ko tanan nga pasahero it RORO vessels kamana man mga drivers it mga behikulo nga sakay it barko gamit ro temperature scanner gun.
