San Mateo, Isabela – Nahaharap ngayon sa kasong bigong pagpatay ang isang step father matapos nitong martilyuhin ang ulo at binti ng kanyang step son sa Brgy. Salinungan East, San Mateo, Isabela.
Sa ibinahaging impormasyon ng Isabela Police Provincial Office (IPPO), kinilala ang step father na si Alfredo Rosete Lorenzo, 62 taong gulang, habang ang biktima o step son ay si Rey Dominguez Reyes, 34 taong gulang, binata, pawang magsasaka at residente ng nabanggit na lugar.
Sa isinagawang imbestigasyon ng PNP San Mateo ay napag-alaman na lasing ang biktima nang umuwi sa kanilang bahay at nagbitaw umano ng masasakit na salita sa kanyang step father.
Dahil dito ay nainsulto naman umano ang suspek sa ginawa ng biktima kung saan ay kumuha umano ng martilyo si Lorenzo at pinukpok nito ang ulo at binti ni Reyes.
Dinala naman agad sa pagamutan ang biktima para sa karampatang lunas samantalang inaresto ng mga barangay tanod ang suspek at dinala sa himpilan ng pulisya.
