Dakong panagtigum ang mahitabo karong adlawa, Sabado, sa tanang religious group sa probinsya sa Sarangani aron subling ihalad ug itugyan ang entiro Sarangani Province sa kabubut-on ug kahimayaan sa Ginoo. Gitawag ang panagtigum nga “Jesus Reigns.”
Segun ni Ms. Michelle Lopez Solon, ang kapikas sa kinabuhi ni Governor Steve Chiongbian Solon ug maoy labaw sa Sarangani Provincial ug Region 12 Tourism Councils, libre ug abri kini sa tanang simbahan ug denominasyon nga nagasangyaw sa pagka-hari ni Ginoong Hesukristo.
Matag tuig kini nga ginapahigayon sulod sa compound sa Kapitolyo sa Sarangani dungan sa selebrasyon sa founding anniversary ug MunaTo Festival sa pagpanguna nila Governor Solon ug Maam Michelle kuyog ang mga maabtikong personahe sa organizing ug working committee, sa pagsuporta nila Senador Manny ug Congressman Ruel Pacquiao, Vice Governor Elmer De Peralta, tanang board member ug mga mayores.
Magsugod ang motorcade ala una sa hapon (1pm) karong adlawa gikan sa municipal grounds sa lungsod sa Alabel padulong sa Sarangani Provincial Gymnasium. Usa ka dakong konsyerto sa mga awit sa praise and worship ang makita nga mulungtad sa sayong kagab-ihon dungan sa mga pangamuyo ngadto sa Kahitas-an nga padayong bendisyunan sa kalinaw ug kalambuan ug mapalayo sa unsa mang kalamidad ug katalagman ang Sarangani ug bisan na ang tibuok Pilipinas. Dungan usab kini matigayon sa 81 ka probinsya sa entiro nasud.
Pagsugod pa lang sa panerbisyo ni Governor Solon isip gobernador, ila na kining na-organisa ang Jesus Reigns, walay laing katuyuan kundili ang padayon nga pagsangpit sa pangalan sa Buhing Dyos nga tuburan sa tanang kaalam ug grasya.
Aminado si Governor Solon nga bug-at ang pagdumala sa gobyerno kung dili mahimong sentro sa panerbisyo ang Ginoo. Gani, kagahapong adlawa atol sa MunaTo IP Day, subli niining gibutyag ang tanang kaayuhan nga “non-stop” matud pa naangkon sa Sarangani tungod sa padayon nga pag-angkla sa kabubut-on sa Labaw nga Makagagahum. Usa si Governor Solon nga mahimong special speaker sa Jesus Reigns karong adlawa.
Samtang, sa pagtapos sa MunaTo Festival 2019, daghan pang aktibidad ang masaksihan karong adlawa sugod pa lang sa alas otso sa buntag (8am). Anaa ang Motocross, Dog Agility Exhibition sa mga nindot nga iro, BMX Bike and Skate Boarding Competition, Drum and Lyre Competition, Mindanao-wide Battle of the Band, ug ang MunaTo Concert sa bandang Slapshock karong gabii; humanon kini sa magarbuhon nga fireworks display.
Kagabii, napuno napud ang Sarangani Capitol Grounds tungod sa Pearl of Sarangani coronation night. Gideklara nga Pearl of Sarangani ang Grade 11 senior high school student garbo sa lungsod sa Alabel nga si Ms. Francesca Morrie Lim. Naghulat na kaniya ang TV network sa GMA tungod kay si Francesca ang mahimong pambato sa Sarangani Province sa programa sa Eat Bulaga nga Miss Millennial Philippines 2020.
Usa sa judge kagabii sa Pearl of Sarangani mao ang artista ug komedyante nga si Wally Bayola sa Eat Bulaga. Ug iyang gikumpirma nga pwede na matud pa mahimong artista si Francesca.
