Davao City – Isip inila nga bulnerableng sektor sa katilingban gumikan sa
mga limitasyon sa pag-protektar sa kaugalingon batok pagpangdagmal ug
klase-klaseng porma sa pagpangabuso, angayan lamang nga hatagan og saktong
suporta ug kaalam ang mga kababayen-an ug mga kabataan sa ilang mga
katungod.
Sukad nga gihatagan og pagtagad ug giduso ang balaod sa pag-atiman sa mga
babaye ug kabataan, taas na kini og naabtan. Apan, nanginahanglan sa
gihapon og dugang duso alang sa husto ug hingpit nga pagpatuman niini ilabi
na diha sa level sa mga kabarangayan diin mao dali-daling masangpit
niadtong mga giabusohan.
Daghan na’ng mga kababayen-an karon nga nahatagan og opurtunidad nga
madunggan ang tingog diha sa atong katilingban. Kung atong lantawon, usa
kini nga maayong kalamboan sukad nga gi-rekognisa ang importansiya sa mga
babaye ug sa mga kabataan. Apan ngano’ng hangtud karon, makaingon kita nga
kining tanan kulang pa gihapon?
Isip usa ka babaye, akong gikalipay og dako nga dunay balaod nga nagduso sa
pag-atiman namo ingon man sa mga kabataan. Nalipay sab ako nga sa
hinay-hinay, gihatagan na kami og higayon nga mohatag sa among opinyon ug
ideya sa nagkadaiyang hisgutanan sa katilingban. Apan alang nako, mas
ikalipay namo og dako kung kaming mga inilang huyang ug bulnerable sa mga
pagpangabusar protektahan mismo sa mga kalalakin-an. Kanindot unta
hunahunaon isip babaye nga ang mga lalaki mismo ang mangusog ug motukod ug
mga balaod sa pag-protektar sa ilang kaugalingong mga asawa ug mga anak.
Apan lagi, kay di man gayud malikayan nga dunay pipila, hinaot nga dili
daghan, nga mga lalaki kinsa mga amahan ug bana ang mao na hinuoy mounay sa
pagpasakit sa ilang mga anak ug asawa diha sa aspeto sa pisikal, emosyonal,
sikolohikal ug ekonomikal.
Hinungdan nga kaming mga babaye padayong mobarug alang sa among mga
katungod, uban ang atong mga kabataan nga mas nanginahanglan usab og dakong
pagtagad ug proteksyon.
Tinuod man nga duna kami limitasyon, apan kini nga limitasyon dili
mamahimong babag sa among pagkab-ot sa mga katungod alang sa among paglambo
isip indibidwal nga dunay dakung kontribusyon sa pagpalamabo sa komunidad.
RadyoMaN Misel Miral
