Suma Total sa Straight to the Point: Ideals

7

Davao City – Kun ako ang pasulti-on, ang akong pili-on nga kapitan o kagawad sa barangay kadtong mamahimo gayud nga matuod nga mga ginikanan sa komunidad: Kadtong mangalagad sa tinud-anay, walay kapin kabubut-on, modelo sa pagkamatarong ug lider nga sulondon.

Dili nako botohan kadtong tawong segurado ko nga walay igong katakos mangalagad, kun karaan na walay ikapasigarbong nahimong agi or performance, kun neophyte o bagito pa, kadtong walay hibangkaagan sa pwesto or salawayon nang daan sa iyang kinabuhing personal.

Bisan sa lebel sa Sangguniang Kabataan, ako nagadasig sa atong mga kaanakan ug mga kabatan-onan: Ayaw ninyo sayangi kun usiki kining talagsaon kaayong kahigayonan nga kamo makabaton sa tingog ug kasinatian sa kadumahalan, mahala ang inyong trabaho, Dodong ug Inday, butangi ug gugma ang matag ninyong aktwasyon ug binuhatan ug pangalagad kamo nga may integridad gikan sa dughan haron walay ikasulti ang inyong mga constituents nga gi-alagaran.

Walay dautan kun ang usaka kandidato kulang sa academic background basta kay bukas lamang ang iyang hunahuna sa pagkat-on sa angayan niyang mahibal-an haron makapanerbisyo siya sa mas maayong pamaagi.

Wala usay dautan kun ikaw miyembro sa usaka iladong angkan sa mga pulitiko: Ang dautan kadtong political dynasty nga gigamit lamang aron magpaburot ug magpabusdik sa tiyan ug benepisyo ang pulitiko, kun gamiton niya ang posisyon haron hasi-on, dauton o bin ba kaha subornohan ang tawo aron ngadto kaniya lamang mopabor.

Kun buot nato ug malungtaron ug bililhong kausaban sa atong katilingban, sugdan nato sa hustong pagpamili sa atong mga kadagkuan sa SK ug sa konseho sa kabarangayan 27 diyas gikan karon.

Pilion nato kadtong may kasingkasing sa serbisyong tunay, may kaisog ug katakos ug may kahadlok sa Kahitas-an haron seguradong dili siya mohimo sa dinautan samtang naggunit sa gahum ug impluwensiya.

RadyoMaN June Duterte

Facebook Comments