Lt. Lamoste 11 ka beses gipusil ni Cpl Indap
Nagmugna na ug Board of Inquiry ang WESTMINCOM sa Armed Forces of the Philippines (AFP) aron maoy mag-imbistiga sa nahitabo pinusilay sulod sa kampo sa military sa Patikul, Sulu nga gikamatay sa usa ka opisyal nga taga dakbayan sa Butuan ug laing napatay ang usa ka Army Major.
Kini ang gibutyag ni Maj. Arvin John Encinas, spokesman sa Western Mindanao Command (WESTMINCOM) sa AFP sa interview sa RMN DXBC Butuan.
Unang giila ang mga napatay sa insidenti nga sila si 1Lt. Ryan Lamoste ug Maj. Rael Gabot dihang gi-rapido sa suspek nga si Cpl. Jack Indap gamit ang R4 armalite rifle kinsa napatay ra usab ang suspek dihang mirespondi ang ilang kauban . Hubog si Cpl. Indap niadtong tungura dihang gisita ni 1Lt. Lamoste ug gipulihan sa pwesto apan misangpot sa away ug namusil ang suspek nga miigu sa duha ka mga opisyal. Gitusak-tusak sa 11 ka mga bala sa R4 ang lawas ni 1Lt. Lamoste.
. Nahidangat na dinhi sa dakbayan sa Butuan ang patay’ng lawas ni 1Lt. Lamoste ug kasamtangang gihaya sa Brgy. Ong Yui ning syudad sa Butuan (with report archer capadeso/ivy falcone).
