General Santos City–Ginasuta na karon sa Police Station 3 kung kinsa ang tulo ka mga suspect nga mibiktima sa usa ka online seller nga si Girly Tandug Chu , 31 anyos ug nanimuyo sa block 8, lot 13, GenSan ville Subdivision, Barangay Bula ning syudad
Pinaagi sa pag salisi sa mga suspect ug pag-abri sa sakyanan niini niadtong milabay nga adlaw alas 11:00 ang takna sa buntag atubangan sa Matutum Hardware nga nahimutang sa J. Catolico Avenue, Barangay Lagao ning syudad.
Sumala pa ni Police Major Joel Martinez ang hepe sa Police Station 3 nga aduna na matud pa silay kopya sa CCTV sa maong panghitabo ug ginasuta nalang nila ang identity sa mga suspect aron nga mapasakaan ug tukmang kaso.
Sa karon anaa matud pa silay nakuha nga posibleng pangalan sa usa sa mga suspect apan ilaha pa kining ginaverify, gani ginasuta pa nila kung dayo ba ang mga nahisgutan o taga gensan lang kini.
Gipalawman na usab sa Police Station 3 kung aduna bay kalambigitan ang mga suspect sa una nang nahitabong mga pag pangawat sa syudad partikular na sa area sa Police Station 3.
Kung kahinumduman nga mipark lang ang biktima sa iyang sakyanan sa lugar apan wala matud pa niini namatikdan nga na-abrihan sa mga suspect ang iyahang sakyanan ayha pa kini nakanaog ug napindot ang lock niini.
Dihang nakagawas na kini sa sakyanan didto na gihimo sa mga suspect ang ilahang plano kung asa nakuha sa mga nahisgutan ang bag sa biktima nga dunay unod mga importanteng dukomento, credit ug debit card, P15,000.00 nga cash ug alahas nga naa sa kantidad nga P55,000.00. (Dave Silagan)
