Lezo, Aklan – Natigayon nga maaresto it mga kapulisan rong sangka agi nga suspek sa pagpanakaw sa banwa it Lezo.
Nakilaea rong suspek kay Ryan Iledan Taglay, 28-anyos ag residente it Brgy. Agcawilan, Lezo samtang rong biktima hay nakilaea kay Necita Yerro-Rembulat, 79- anyos it Poblacion, Lezo ag sangka US pensioner.
Suno kay SPO2 Joven Vega it Lezo PNP, nga nadiskubrehan ko biktima nga nagkaeaduea ro anang mga kwarta sa drawer nga nahamtang sa anang kwarto Biyernes it hapon.
Pero bago pa man natabo rong insidente hay nahapan-uhan it biktima rong suspek nga una sa andang compound nga uwa man raya ginpaadtuna nanda.
Nakabaton pa gid it impormasyon ro mga kapulisan nga nakita rong suspek nga maabo ro anang kwarta ag nakabakae it bag-ong motorsiklo.
Insigida nga nagpatigayon it follow up operation rong Lezo PNP kung sa siin natigayon raya nga madakpan sa may parte it Cortes, Balete.
Narekober halin sa suspek ro USD 10,925, ag kapin P146, 000.00 nga Philippine money ag kamana man rong bag-ong motorsiklo.
Nasayuran nga rayang suspek hay ginapatawag it biktima kung sanda ra hay may ginapaubra kung sa siin ulihi rayang nakita sa andang baeay ko Enero 20.
Magapangatubang it kasong qualified theft ro nasambit nga suspek.
