Koronadal City–Malampusong nasikop sa tropa sa Koronadal City PNP ang suspek sa pagpatay sa magtiayong Arthuro ug Erlinda Aquino sa may Purok Maligaya, Barangay Magsaysay, Koronadal nga nahitabo niadtong Domingo sa gabie.
Giila ni Police Lt. Rey Sotelo, nga nakabase sa investigation section sa Koronadal City PNP, ang suspek nga si Paul John Membrado, 19, paryente sa biktimang si Erlinda Aquino.
Matud ni Sotelo, nga nagtrabaho isip laborer sa magtiayon ang suspetsado ug sulod gawas ra usab kini sa panimalay sa magtiayon gumikan ila man kining paryente.
Base sa saysay sa suspek ngadto sa kapulisan wala kini personal nga kasuko ngadto sa mga biktima, wala usab kini nakainum niadtong higayuna ug wala usab siya nagagamitan ug iligal nga droga.
Sumala sa suspek nga siya gibulagan sa iyang 13 anyos nga uyab ug usa sa mga kondisyon sa nahisgutan aron siya balikan niini mao nga maghimo siya ug krimen sama sa pagpatay. Tungod niini nahimo niya ang pagpatay sa magtiayon kansa giisip na niining mga apuhan.
Hugtanon usab nga gihimakak sa uyab sa suspek ang aligasyon sa nasampit. Sumala niini nga wala niya gisugo nga mopatay ug tawo ang iyang kanhing uyab. Posible matud pa nga gihimo lang kining rason sa suspetsado human niya nahimo ang ngilngig nga krimen.
Una nang nadakpan ang suspek sa may Purok Cabaylo, Barangay San Roque, Koronadal kung asa nakuha sa iyang posisyon ang kutsilyong gigamit niini sa pagpatay ngadto sa magtiayon.
Sa karon ang suspek balhog na sa silda sa Koronadal PNP samtang takda na kining kasuhan ug 2 counts of murder.
