SUV vs dump truck: Amahan patay, anak kritikal sa disgrasya sa Sta. Cruz

Davao City – Dead on arrival ang driver sa sport utility vehicle (SUV) human nabangga sa usa ka dump truck sa highway sa Barangay Tuban, Sta. Cruz, Davao del Sur alas 3:15 kagahapon sa hapon (Abril 27, 2022).

Sa interbyu sa DXDC RMN Davao kang Police Staff Sergeant (PSSg) Jessie Jul, imbestigador sa Sta. Cruz Municipal Police Station (MPS), giila niini ang driver sa SUV (Toyota Fortuner) nga si Reynante Tinapay, 39 anyos, residente sa People’s Village, Maa, Davao City ug kauban niini ang iyang 14 anyos nga anak nga lalaki.

Gibutyag ni Jul nga pa-southbound ang direksyon sa SUV samtang, pa-northbound ang dump truck nga gimaneho ni Julifer Gallo, 30 anyos, residente sa Pulang Lupa Mlang, Cotabato.

Saysay sa imbestigador nga ang duha ka sakyanan nagsubay sa inner lane sa dalan sa dihang kalit lang nag-counterflow ang SUV. Tungod sa kakusog sa impact, nabawian sa kinabuhi ang SUV driver ug kritikal ang iyang anak nga padayong ginatambalan sa ospital.

“Pag-abot sa Barangay Tuban, kini si V2 (Vehicle 2), si Toyota ni-counterflow towards the direction ni King Long (dump truck), then nag-abot sila, head-on collision. Tapos nag-sustained injury ang driver sa Fortuner ug ang iyang pasahero. Unfortunately, si Reynante, kadtong driver, dead on arrival sa ospital while si (iyang anak) under treatment pa gihapon,” saysay ni Jul.

Kasong reckless imprudence resulting to homicide and damage to property ang atubangon sa driver sa dump truck nga anaa na sa kamot sa kapulisan.

Panawagan sa awtoridad sa mga motorista nga kanunay nga mag-igmat sa dalan ug dili magpakusog og dagan aron malikayan ang disgrasya. Hunahunaon usab kanunay nga adunay pamilya nga nagpaabot sa balay.

RadyoMaN Kirby Manzon

Facebook Comments