Patay ang usa ka taas nga opisyal sa New Peoples Army o NPA human ang nahitabong enkwentro tali sa mga miyembro sa 65th Infantry Battalion sa Sitio Magantol, Barangay Kalilangan, Baungon, Bukidnon mga alas singko sa buntag niadtong Dominggo.
Sa interview sa dxCC-RMN kang Police Chief Inspector Christian Relevo, Hepe sa Baungon Municipal Police Station, gibutyag niini nga wala pa maila ang patayng lawas sa maong rebelde.
Nasayran nga nagpahigayon og security patrol ang mga sundalo ubos sa Charlie Company sa pagpangulo ni Sergeant Champ Labitad sa Sitio Magantol sa dihang natagbo nila ang dili mominus usa ka gatus ka mga miyembro sa NPA ug didto nahitabo ang engkwentro na niabot sa 40 minutos.
Nakaangkon sa igo sa ulo ang NPA gamit ang M-16 armalite rifle sa mga sundalo nga maoy hinungdan sa kamatayon niini.
Gikumpirmar sa militar nga miyembro sa NPA maong namatay tungod sa gisuot niining T-shirt nga dunay marka nga “100 October Revolution 1917-2017”.
Na-recover sa bulsa sa NPA ang usa ka pakite sa Marijuana, noodles, lighter ug uban pang personal nga gamit.
Naa na karon sa Saint Bernard Funeral Parlor sa Baungon Bukidnon ang patayng lawas sa NPA.
