Gikasubo nga dili lakip sa mandato sa Fertilizer and Pesticide Authority (FPA) ang pagkontrolar sa presyo sa mga abuno sa nasud.
Kini ang gibutyag ni Maria Sonia Caliha, Regional officer sa Fertilizer and Pesticide Authority (FPA)-X atol sa interview sa RMN DXMB Malaybalay.
Sumala ni Caliha nga mandato sa FPA nga masiguro nga sakto ang supply sa mga abuno sa nasud alang sa mga mag-uuma.
Dugang niya nga hinungdan sa taas nga presyo sa abuno ang pag-import sa 90% niini sa laing nasud. Maong diktado gayud ang presyo sa mga abuno sa nasud sa import price niini.
Gikasubo usab ni Caliha nga mas mutaas pa kini sa nahibiling adlaw sa Oktubre hangtud na sa Disyembre ning tuiga.
Ang mga main materials sa pagmugna sa fertilizer maoy taas ang mga presyo maong mutaas usab ang presyo sa mga abuno pag-abot diri sa nasud.
Maong pag-awhag ni Caliha sa mga mag-uuma nga tagaag pagtagad ang pagbuhat og mga Organic Fertilizers aron nga mas makatipid ug mahilikay sa taas nga presyo sa mga Inorganic Fertilizers.
