Taga Naawan nga OFW nga gi isolate samtang naghulat sa resulta sa iyang NCOV Test, mireklamo sa kalangay sa DOH

31

Mi-reklamo na ang overseas Filipino worker o OFWP, kinsa gi-isolate sa usa ka hospital sa Misamis Oriental sugod niadtong Pebrero 3, tungod sa hinay nga lihok sa Department of Health nga mapagawas ang resultas iyang swab test human ang 48 oras.

Sa interview sa cellphone ngadto sa 29 anyos nga OFW, miingon siya nga iyang gilaumang mahibaw-an ang resulta niadtong Biyernes tungod na usab sa pasalig sa DOH nga maoy mikuha sa iyang swab sample.


Kung kahinumduman nga nahidangat sa iyang pinuy-anan sa Naawan ang babayeng OFW gikan sa Hongkong niadtong Pebrero 1 ug gikuha siya sa local government unit sa ilang balay aron isulod sa isolation room sa usa ka tambalanan niadtong Pebrero 3.

Una nang miingon si Naawan Mayor Dennis Roa nga nadawat sa LGU ang impormasyon kabahin iyang pag-uli gikan sa usa ka concerned citizen.

Nagsunod, matud pa, ang LGU sa direktiba sa Department of Interior and Local Government (DILG) nga motabang sa DOH sa pag-ila, pag-monitor ug pag-isolate niadtong manguli o kaha mobisita gikan sa mga nasud nga na-report nga dunay kumpirmadong kaso sa 2019 novel corona virus.

Unang gikuhaan ang maong OFW sa iyang swab sample niadtong Pebrero 4 ug giingnang mogawas ang resulta human ang 48 oras o niadtong Huwebes.

Laing swab sample ang gikuha kaniya niadtong Miyerkoles ug giingnang Biyernes mogawas ang resulta.




Apan niadtong Biyernes, nadawat niya ang tubag nga niadto pa’ng Biyernes gipadala ang iyang mga swab samples ug sa Lunes pa gilaumang mahibaw-an ang resulta.

Niadtong Sabado sa gabii, mipahibalo si Mayor Roa sa DXIC RMN Iligan, pinaagi sa text, nga wala pa siya makadawat og resulta gikan sa DOH.

Gikaguol sa maong OFW ang iyang kahimtang tungod kay wala na siya maka-report sa iyang agency aron unta ipahibalo nga gipapa-uli siya sa iyang employer nga bisan og wala pa matapos ang iyang kontrata.

Daghan usab siya, matud pa, og mga importanteng lakaw nga wala na niya nahimo tungod sa pag-isolate kaniya. (Divina M. Suson, February 10)

Facebook Comments