iFm Laoag – Inrakurak ni Provincial Agrarian Reform Program Officer II Vic M. Ines a tallo nga Agrarian Reform Beneficiaries Organizations wenno ARBOs ti makaawat ti traktura manipud iti Department of Agrarian Reform – Ilocos Norte.
Kuna ni Ines, dagiti ARBOs a maikkan ti tractor ket dagiti sumaganad: San Cristobal Multipurpose Cooperative ti Sarrat; Bomitog Multipurpose Cooperative ti Banna; ken Sansa Nagcamarinan Irrigators Association ti Burgos.
Inbatad met ni Senior Agrarian Reform Program Technologist Marie Florence M. Pacial a ti balor ti kada tractor, karaman dagiti maikabit a farm implements, ket agarup P950,000.
Itay napan a lawas, naiwayat ti pannakapirma ti Memoradum of Agreement (MOA) iti nagbaetan ti DAR Ilocos Norte ken dagiti maikkan ti traktura.
Naipalaon iti MOA dagiti agbalin nga obligasion dagiti nasao nga ARBO iti pannakausar ken pannakataripato dagiti maited kadakuada a “common service facility”.
Ti pannakaibunong dagitoy a pasilidad ket paset pay laeng ti Climate Resilient Farm Productivity Support Program ti DAR Ilocos Norte.
Pormal a maiyawat dagiti traktura kadagiti ARBOs iti daytoy a lawas. [Detalye manipud ken ni Jorge Guerrero]
Bernard Ver, RMN News
