Tampakan, South Cotabato–Gipaklaro ni Police Captain Joseph Villanueva ang chief Of Police sa Tampakan Municipal Police Station nga blangko pa sila sa pagkakaron sa motibo sa pagpusil sa duha ka mga batan-on kung asa patay ang usa niini nga si Benjo Sapio, 20 anyos, ulitawo, nanimuyo sa Prk, African Daisy, samtang samdan usab si Vanjun Yniguez, 20 anyos, estudyante, residente sa purok Ramos, brgy. Poblacion, Tampakan.
Dugang asoy ni Villanueva nga ilaha pang hulaton ang usa ka biktima nga makasulti na ug tarong aron makahatag ug pamahayag kalabutan sa panghitabo kung namay-ungan ba niini ang mga suspek nga mipusil kanila aron ilang mahimoan ug cartographic sketch aron mailhan ang mga responsable.
Pagbutyag ni Villanueva nga usa lamang ka mga simpleng tawo ang mga biktima ug walay mga rekord nga natala sa ilang buhatan ingon man sa brgy nga dunay hinimoan nga dili maayo ilabi na sa illegal nga droga.
Nasayran nga gikan matud pa ang mga biktima sa ilang panimalay ug migawas lamang kini gumikan kay dunay paliton nga sigarilyo sa tindahan.
Samtang gabaktas ang mga biktima sa dalan niadtong higayona duna matud pay usa ka Toyota Avanza ang mihunong duol sa mga nasampit ug nangutana pa nganong anaa pa sila sa gawas nga curfew hour na.
Sumala pa sa opisyal nga diretso gipamusil ang mga biktima sa walay igong rason sa wala mailhing mga suspek nga miresulta sa pagkaigo sa mga biktima sa dughang bahin sa ilang lawas nga maoy hinungdan sa kamatayon ni Sapio. (Reynald Timario)
