CAUAYAN, NEGROS OCCIDENTAL – Ginbuyagyag sang asawa sang lalaki nga suspek nga hungod nga naghulog kag nagpatay sa ila bata sa Brgy. Basak, banwa sang Cauayan nga sadto gali may ginpatay naman nga isa pa gid nila ka bata ang iya bana.
Suno kay Lisa Alandroque, asawa sang suspek nga si Jolito Alandroque, 47 anyos ang edad nga sa nagligad nga tuig 2016, nahulog man ang iya sini ginabusong nga pito ka bulan nga lapsag tuga man sang hubog niya nga bana.
Pahayag ni Lisa nga ang natabo amo nga isa sadto ka adlaw, nagpauli man nga hubog kag nagmaoy ang suspek kag iya sini napungkuan ang iya tiyan.
Bangud sini, nahulog ang bata kag patay na ini sang nag-gwa sa iya tiyan sa ila balay matapos nga wala na ini nadala sa ospital.
Si Jolito ang isa ka karga-tapas samtang ang iya naman asawa ang housewife, may duha sila ka iban pa gid nga mga kabataan, 6-anyos nga babayi kag 3 ka tuig nga bata nga lalaki.
Madumduman nga sadtong December 28, nagpauli nga hubog ang suspek kag iya naabtan nga nagahibi ang ila 28-dias nga bata.
Bangud nga nagahuran si Jolito, iya sini ginbitin paibabaw ang lapsag kag hungod nga ginbuy-an rason nga nalampos ang bata kag napatay.
Kaso nga parricide ang ginpasaka na batuk sa suspek sa Provincial Prosecutor’s Office./dyHB BACOLOD
