Tatlo tanan ka mga barko ang nagsadsad sa hunasan matapos maglaslas si Bagyo Odette sa Bacolod City kag Negros Occidental.
Sa Bacolod City, ang LCT Citic 102 ang nagtungtong sa receiving pipeline sang Petron sa Barangay Banago, sandig sa ginpatigayon nga underwater ocular inspection sang amo nga kompaniya.
Wala sang oil spill nga nakita apang gipanugyanan ang kapitan sang barko nga halugan ang anchor agud indi maguba ang pipeline.
Samtang, nasadsad man sa area sang Bredco Port ang M/V Jake Vincent Dos. Sa ginpatigayon nga inspection sang Philippine Coast Guard Bredco Substation, wala sang crew sa barko matapos nga gin-abandonar ini kag naga-angkorahe lamang sa sulod sang duha katuig.
Wala sang oil spill nga nakita bangud nga wala sang unod ang tangke.
Sa Sipalay City, ang M/T Mary Queen of Hope ang nasadsad sa Campomanes Bay, Barangay Maricalum kahapon sang hapon, Disyembre 18.
Base sa record sang PCG-Negros Occidental, nagbiya sa Bredco Port ang barko sadtong Disyembre 15 agud magpadulong sa Sipalay agud magpalipod sa Bagyo Odette.
Sa ginpatigayon nga assessment sa hull, naguba ang starboard engine apang wala sang oil spill nga na-record.
