Mambusao, Capiz – Patay ang duha ka mga persona samtang pilason ang isa ka menor de edad matapos ginpangbuno sa Poblacion Proper, Mambusao, Capiz mga alas 10:00 ang takna kagab-i. Ginkilala ang mga napatay nga sanday, Nildo Llabore 42-anyos sang Poblacion, Mambusao kag Aiza Isuma sang Barangay Manibad, Mambusao, Capiz.
Samtang padayon nga ginabulong sa St. Anthony College Hospital ang 15-anyos nga menor de edad nga manghod sang napatay nga si Aiza. Gilayon naman nadakpan sang Mambusao PNP ang suspek nga ginkilala kay Rogelio Salaya sang Brgy. Batiano sang nasambit nga banwa nga ginapahayag kahagugma sang menor de edad.
Sa inisyal nga imbestigasyon sang mga kapulisan, ginapilit sang suspek nga si Salayan nga kuhaon ang sim card sang kahagugma, apang wala ini ginhatag sa iya.Naakig ang suspek kag una sini nga ginbuno ang kahagugma nga menor de edad. Nakita ni Nildo Llabore ang insidente kag nagtambag ini apang nabun-an man ini.
Nagpalapit man si Aiza agud buligan ang manghod apang ginbuno pa gid ini sang suspek. Bangud sang mga patal nga pilas tuga sang pagbuno sa lawas nanday Nildo Llabore kag Aiza Isuma, ginbawian ang mga ini sang kabuhi.
