Davao City – Gikumpirmar sa Task Force Davao ang mga ginunting nga daw Philippine flag nga adunay gipataban nga sulat nga naka-address kang Mayor Sara Duterte nga gikatag katag sa dalang San Pedro ning syudad sa Davao kagahapon sa buntag.
Sumala ni Captain Jonathan Sarausas, sa TFD nga ila pang gi validate kun unsa ka genuine ang sulat kansang naka adress kang Mayor Sara ug gikan sa nagpailang teroristang ISIS nga nagdeklara sa ilang pagsulod sa dakbayan.
Matud ni Sarausa nga angay tinuon ang maong sulat basin ug laing grupo kini nga buot lamang lubugon ang kahusay ug kalinaw ingun man hadlukon lamang ang publiko.
Gidugang ni Sarausa nga samtang wala pa matapos ang ilang inbestigasyon mas gipahugtan karon sa TFD inabagan sa DCPO ang gipatumang seguridad ilabina nga nagsingabot ang Kadayawan festival.
Sa samang bahin, gihimakak ni Sarausas nga adunay massive recruitment ang teroristang ISIS sa mga dagkong unibersidad ug tunghaan sa syudad sa Davao.
Gipaklaro ni Sarausas nga walay namonitor ang TFD nga recruitment sa ISIS dinhi sa Davao dili susama sa taho nga pagpangrecruit sa maong grupo sa mga unibersidad sa Visayas ug Luzon.
Gani makanunayon ang pagsulod sa TFD sa mga unibersidad aron ipasabot sa mga estudyante kun unsa ka mangtas ug ka delikado kining mga grupo nga nagsabwag ug paninurismo.
RadyoMaN Erin Lumosbog
