NEGROS OCCIDENTAL – Duha ang biktima sang pagpanglabo, isa gintiro kag isa ginbuno sa nagkain-lain nga insidente nga natabo sang nagligad nga weekend ukon Domingo nga adlaw.
Ang mga biktima nga ginpanglabo nakilala nga sanday Ceferino Anuver, 61, sang Brgy. Bacong, Bago City kag Arnel Magdale, 48, pumuluyo sang Brgy. Pasil, EB Magalona.
Si Ceferino ginlabo sang wala makilala nga suspek mga las 6:25 kahapon sang gab-i sa amo man nga lugar kag nakaangkon ini sang madamo nga pilas sa iya lawas.
Samtang, si Arnel naman ang ginlabo pasado las 12 sang tungang gab-i sa Brgy. Guinhalaran, Silay City kag nag-angkon sang pilas sa iya liog.
Gindala man sa ospital ang biktima sang pagpangluthang nga nakilala kay Ryan Castillo, 28 anyos ang edad sang Brgy. Alyansa, Bago City.
Suno sa upod sang biktima, nga samtang ini sila ang nagatindog pasado las 7 kagab-i, may nag pundo nga Carry nga salakyan kag hinali na lamang nga gintiro sang wala makilala nga suspek ang biktima kag naigo sa iya tiyan.
Nabiktima naman sang pagpang-buno si Ferjun Villaruz, 18, pumuluyo sang Brgy. 3, Talisay City.
Ang insidente natabo mg alas 11:40 kagab-i sa ila man lamang balay. Suno sa iya, nag-away sila sang iya man lamang utod tubtub nga naglab-ot sa pagbinun-anay.
Sa karon ang amo nga mga biktima ang padayon nga ginabulong sa Corazon Locsin Montelibano Memorial Regional Hospital./dyHB BACOLOD
