General Santos City—patay ang top 1 most wanted sa target list sa Regional Drug Enforcement Unit 12, human nisukol atol sa gilusad nga anti-drug operation kagahapong adlawa sa may Champaca St., corner Naranjita Street, Barangay South, Gensan alas 4:00 ang takna sa hapon, kagahapong adlawa.
Giila ang suspetsaodng namatay nga si Bryan Cortado, 37, residenti sa Zone 2-B, Barangay Bula ning syudad.
Nasayran nga usa ka miyembro sa kapulisan ang nagpakarong-ingnong mupalit ug droga ngadto sa suspek, nagsabot matud pa ang mga nahisgutan nga tua sa Champaca Street mag pinalitay ug droga. sakay ang suspek sa iyang sakyanan nga usa ka Mitsubishi Lancer nga may plate number LCF 810.
Dihang gihimo ang pinalitay, nakamatikod ang suspek nga pulis ang iyang nakatransaksyon mao nga misuway kini ug sibat apan gibabagan sa mga pulis nga sakop sa RDEU-12. Didto na mibunlot ug pusil ang suspek dayon gipabuto punting sa mga pulis. Wala hinuoy naigo sa mga pulis, didto na mibalos ang otoridad sa pagpabuto ug armas nga miigo sa suspetsado nga miresulta sa iyang kamatayon.
Narekober sa kapulisan ang (1) ka .38 revolver nga may 5 ka buhing bala ug mga drug paraphernalia, ug usa ka metal case nga may lima ka sachet sa gituohang shabu. Nasayran nga dugay nang gimonitor sa kapulisan ang suspek gumikan sa kalambigitan niini sa iligal nga droga.
