General Santos City—Patay ang usa ka utility worker sa DPWH human kining gipusil sa wala pa mailhing mga suspetsado alas 7 sa kagabhion sa Barangay Baluan Gensan. Ang biktima naila sa pangalang usa ka Emmanuel Jalando-on, hingkod ang panuigon, residente sa Purok Masagana, Barangay Baluan, Gensan.
Unang nakadawat ug report ang Police Station 3, gikan sa usa ka Barangay tanod sa Baluan bahin sa insidente, pag-bot sa kapulisan, wala na ang biktima human nga nadala na kini sa ospital. Sumala ni Police Lt. Felix Minion III, Deputy Chief of Police sa Police Station 3, migawas sa imbestigasyon nga nag-inum ang biktima sa usa ka tindahan uban ang iyang mga amigo, kalit matud pa nga miabot ang wala mailhing suspek sakay sa usa ka Honda wave motorsiklo kolor pula nga walay plate number, wala nay daghang sulti kalit kining mibunlot ug armas dayon gipusil sa biktima sa makadaghang higayon.
Igo ang biktima sa iyang dughan, tiyan ug paa. Paspas nga misibat ang suspek human sa pagpamusil, samtang ang biktima dali nga gidala sa SOCCSKSARGEN Hospital apan human sa pipila ka oras, nakabsan kini sa iyang kinabuhi. Narekober sa crime scene ang unom ka empty shell ug duha ka slug sa kalibre 45 nga pistola. Samtang usa sa mga ginatan-aw nila nga motibo sa krimen mao ang personal grudge pero wala usab nila ginabalewala ang uban pang anggulo nga posibleng motibo sa krimen.
